पर्सा । ज्यान मार्ने उद्योग मुद्दामा धरौटीमा रिहा भएका पर्सा जिल्ला अदालतका एकजना कर्मचारी सहलेखा पालको रूपमा पुनः अदालतमा हाजिर भएका छन् । पकाहाँ मैनपुर गाउँपालिका वडा नं. २ का ३० वर्षीय अनिल कुमार कुशवाहा गत बैशाख ११ गते ७० हजार धरौटीमा रिहा भएका थिए ।
धरौटीमा रिहा भएपछि कुशवाहा भदौ ११ मा अदालतको लेखा शाखामा सहलेखा पालको रूपमा हाजिर भएका हुन् । उनी कोष तथा लेखा नियन्त्रण कार्यालय रामेछापबाट सरुवा भएर पर्सा अदालतमा कार्यरत छन् ।
कुशवाहा ज्यान मार्ने घटनामा संलग्न भएको अभियोगमा फरार थिए । उक्त मुद्दामा उनीसहित नौ जना विरुद्ध ०८२ बैशाख ९ मा स्थानीय हृदयनारायण महतोको जाहेरी दर्ता भएको थियो ।
कानुन व्यवसायीहरूले भनेका छन् कि धरौटीमा छुट्नु दोषमुक्त हुनु होइन, केवल थुनामुक्त हुनु मात्र हो । यस किसिमका संवेदनशील मामिलामा अदालतले बढी सावधानी अपनाउनुपर्ने उल्लेख गरिएको छ ।
पर्सा जिल्ला अदालतका श्रेस्तेदार प्रभाकर मलिकले भनेका छन् कि लेखा शाखामा कार्यरत कुशवाहाले न्यायिक निर्णय प्रक्रियामा प्रत्यक्ष प्रभाव पार्ने सम्भावना नभएकोले मुद्दामा कुनै फरक नपर्ने जानकारी दिएका छन् ।
