सर्लाही । सिटिईभिटीले सर्लाहीको चन्द्रनगर गाउँपालिका–५ बबरगञ्जस्थित चन्द्रनगर पोलिटेक्निक इन्स्टिच्युटका दुई प्राविधिक शिक्षा कार्यक्रम बन्द गर्ने तयारी गरेपछि त्यसलाई रोक्नुपर्ने माग उठेको छ ।
सो विषयमा सिटिईभिटी मधेश प्रदेश प्रादेशिक कार्यालयका प्रमुख तथा उपप्रमुखसँग छलफल बैठक सम्पन्न भएको चन्द्रनगर गाउँपालिकाले जनाएको छ ।
सिटिईभिटीका अनुसार शून्य पूर्वाधारमै सुरु गरिएको सो इन्स्टिच्युटमा आवश्यक पूर्वाधार अपुग भएकै कारण बारम्बारको अनुगमनपछि कार्यक्रम बन्द गर्नुपर्ने अवस्था आएको हो ।
विगत एक वर्षदेखि उक्त इन्स्टिच्युटको पूर्ण आर्थिक अधिकार र जिम्मेवारी संचालन व्यवस्थापन समितिले लिएको भए पनि आवश्यक सुधार नभएको सिटिईभिटीको भनाइ छ ।
यता गत श्रावणमा बबरगञ्जमै बसेको बृहत् परामर्श बैठकले इन्स्टिच्युटको प्रभावकारी सञ्चालन र व्यवस्थापनका लागि पुनः जिम्मेवारी चन्द्रनगर गाउँपालिकालाई दिने निर्णय गरेको थियो । सोही निर्णयअनुसार गाउँपालिका अध्यक्ष राजकुमार महतोले सिटिईभिटी प्रादेशिक कार्यालयमा पहल थालेका हुन् ।
