सर्लाही । सर्लाहीको चन्द्रनगर गाउँपालिका–१ किसनपुरमा गाउँपालिकाको शिक्षा शाखा प्रमुख कमला बस्नेतमाथि गालीगलौजसहित हातपातको प्रयास भएको घटना सार्वजनिक भएको छ ।
विद्यालय व्यवस्थापन समिति गठनका क्रममा विवाद चर्किँदा वडा नं. १ का अध्यक्ष रामेश्वर प्रसाद महतोसहितको टोलीले बस्नेतमाथि दुर्व्यवहार गरेको भिडियो सार्वजनिक भएको हो ।
सोमबार किसनपुर माध्यमिक विद्यालयमा व्यवस्थापन समिति गठनका लागि भेला बोलाइएको थियो। तर, वडा अध्यक्षको अनुकूलता अनुसार समिति गठन नभएपछि विवाद उत्पन्न भएको बताइएको छ ।
स्थानीयका अनुसार वडा अध्यक्ष महतोसहित उनका सहयोगीहरू—राम साह हलुवाई, भरत गुप्ता, दरोगा पासवान र किशोरी राय—ले शिक्षा शाखा प्रमुखमाथि गालीगलौज गर्दै हातपातको प्रयास गरेका थिए । घटनापछि कर्मचारीलाई गाउँबाटै लखेटिएको स्थानीय सुनिल महतोले बताए ।
अर्का स्थानीय युवा रमेश यादवका अनुसार विद्यालय व्यवस्थापन समिति सर्वसम्मत रूपमा गठन गरिएको थियो र सोही प्रक्रियाअनुसार रामपुकार महतो चयन भएका थिए । तर, वडा अध्यक्षले असन्तुष्टि जनाउँदै निर्णयमा हस्ताक्षर गर्न अस्वीकार गरेका थिए ।
यति मात्र नभई, अध्यक्ष महतोले निर्णयसम्बन्धी माइन्युट बुकसमेत खोसेर च्यातेका आरोप छ ।
स्थानीयले जनप्रतिनिधिबाटै यस्तो व्यवहार हुनु लोकतन्त्रको उपहास भएको बताएका छन् । “नियमअनुसार भएको निर्णयलाई व्यक्तिगत स्वार्थका आधारमा अवरोध गर्नु कत्तिको न्यायसंगत हो?” भन्ने प्रश्न समेत उनीहरूले उठाएका छन् ।
घटनाले स्थानीय तहमा सुशासन, पारदर्शिता र कर्मचारी सुरक्षामाथि गम्भीर प्रश्न खडा गरेको भन्दै सरोकारवालाले निष्पक्ष छानबिन र दोषीमाथि कारबाहीको माग गरेका छन् ।
यस्तै, छानबिन नभए कडा आन्दोलनमा उत्रिने चेतावनीसमेत स्थानीयले दिएका छन् ।
