काठमाडौँ । दरबन्दीअनुसार कार्यालयमा खटिनुपर्ने प्रहरी सहयोगीलाई उच्च प्रहरी अधिकारी तथा पदस्थ व्यक्तिहरूको निजी आवासमा पठाउने गरिएको गुनासो सार्वजनिक भएको छ ।

नेपाल प्रहरी प्रधान कार्यालय अन्तर्गत सुरक्षा सेवा व्यवस्थापन महाशाखा नक्सालमार्फत सहयोगीलाई विभिन्न हाकिमको घरमा कार्यका लागि पठाइन्छ । तर त्यहाँ उनीहरूलाई तोकिएको जिम्मेवारीभन्दा फरक निजी काम लगाइने, कार्यअवधिभन्दा बढी समय खटाइने र यसरी सेवा दिँदा मानसिक तनाब र आत्मबलमा गिरावट आउने गरेको पीडितहरूको प्रहरीहरुको भनाइ छ ।

प्रहरी सेवामा रहेर पनि आफूलाई सामान्य घरेलु नोकरझैँ व्यवहार गरिएको अनुभव उनीहरूले सुनाएका छन् । हाकिमहरूको आवासमा खटिँदा तल्लो स्तरको गालीगलौज र धम्कीपूर्ण व्यवहार सहनुपर्ने अवस्था रहेको उनीहरूको आरोप छ ।

संगठनभित्रै यस्ता असंगत अभ्यास बढ्दा प्रहरी सेवाप्रति नै विश्वासमा आँच आउने चेतावनी दिइएको छ । पीडितहरू भन्छन्, “यदि प्रहरी सहयोगीलाई हाकिमकै घरमा पठाउने हो भने दरबन्दी वा काज पनि त्यहीँ तोकिनुपर्छ ।”