महोत्तरी । महोत्तरीमा नेपालबाट भारततर्फ अवैध रूपमा तस्करी गरेर लैजान लागिएको तीन वटा पिकअप गाडीमा लोड गरिएको चाइनिज स्याउ सशस्त्र प्रहरी बलले नियन्त्रणमा लिएको छ।
शनिबार राति करिब १ बजेको समयमा विशेष सूचनाका आधारमा खटिएको सशस्त्र प्रहरी टोलीले सीमावर्ती क्षेत्रमा शंकास्पद रूपमा गुडिरहेका तीन वटा पिकअप गाडी रोकेर जाँच गर्दा ठूलो परिमाणमा स्याउ बरामद गरेको हो।
सशस्त्र प्रहरी स्रोतका अनुसार प्रारम्भिक अनुसन्धानमा उक्त स्याउ भन्सार छल्दै भारततर्फ लैजान लागिएको खुलेको छ। बरामद गरिएको स्याउको परिमाण ठूलो रहेको र त्यसको बजार मूल्य लाखौं रुपैयाँ बराबर हुन सक्ने अनुमान गरिएको छ। यद्यपि, आधिकारिक मूल्याङ्कन प्रक्रिया भने जारी रहेको जनाइएको छ।
स्रोतका अनुसार बरामद गरिएको स्याउ ‘सुनिल’ नाम गरेका एक व्यापारीको रहेको खुलेको छ। यद्यपि, उनको पूर्ण परिचय तथा यस घटनामा संलग्न अन्य व्यक्तिहरूको पहिचान गर्न थप अनुसन्धान भइरहेको सशस्त्र प्रहरीले जनाएको छ। चालक र सहयोगीहरूमाथि समेत सोधपुछ भइरहेको बताइएको छ।
खुला सीमाका कारण महोत्तरीसहित तराईका सीमावर्ती जिल्लामा तस्करीको समस्या वर्षौंदेखि जटिल बन्दै गएको छ। दैनिक उपभोग्य सामग्री, लत्ताकपडा, इलेक्ट्रोनिक्सदेखि फलफूलसम्म अवैध ओसारपसार हुने गरेको पाइएको छ। विशेषगरी रातिको समयमा तस्कर समूह बढी सक्रिय हुने गरेको सुरक्षा निकायको भनाइ छ।
सशस्त्र प्रहरीले बरामद गरिएको स्याउ र पिकअप गाडी आवश्यक कारबाहीका लागि सम्बन्धित भन्सार कार्यालयमा बुझाउने तयारी गरेको छ। साथै, तस्करीमा संलग्न मुख्य गिरोहसम्म पुग्न अनुसन्धानलाई तीव्र बनाइएको जनाएको छ।
