सर्लाही : नेपाल–भारत सीमाको सुरक्षामा सघन सहकार्य गर्ने उद्देश्यले सर्लाही, महोत्तरी, रौतहट र भारतको सितामढी जिल्लाका सुरक्षा तथा प्रशासनिक निकायबीच संयुक्त बैठक सम्पन्न भएको छ । सोमबार साँझ भारतको सितामढीमा आयोजित उक्त बैठकमा दुवै देशका सम्बन्धित जिल्लाका उच्च अधिकारीहरूको उपस्थिति थियो ।
नेपालको तर्फबाट प्रमुख जिल्ला अधिकारीहरू, सहायक प्रमुख जिल्ला अधिकारी, नेपाल प्रहरी, सशस्त्र प्रहरी, राष्ट्रिय अनुसन्धान विभागका प्रमुखहरू र भन्सार कार्यालयका प्रतिनिधिहरू उपस्थित रहेको थियो । भारत तर्फबाट सितामढीका मुख्य जिल्ला अधिकारीको नेतृत्वमा प्रहरी अधिक्षक, एसएसबी तथा भन्सार कार्यालयका पदाधिकारीहरू सहभागी भएका थिए ।
बैठकमा खुला सीमाका कारण बढ्न सक्ने आपराधिक गतिविधिहरू—जस्तै लागुऔषध र मदिराको अवैध ओसारपसार, चोरी–तस्करी, अवैध मुद्रा कारोबार—नियन्त्रण गर्ने विषयमा छलफल गरिएको थियो । साथै, आपसी सूचना आदानप्रदानलाई प्रभावकारी बनाउने र सीमाक्षेत्रमा शान्ति तथा सुरक्षालाई सुदृढ बनाउने उपायहरूमा सहमति जनाइएको थियो ।
जिल्ला प्रशासन कार्यालय सर्लाहीका अनुसार, यस्ता संयुक्त समन्वय बैठकहरू समयसमयमा गर्दै आइएको छ, जसले नेपाल–भारतबीचको सीमा सुरक्षा सहकार्यलाई थप मजबुत बनाएको छ ।
