केही वर्षअघिसम्म सर्लाहीको हरिवन नगरपालिका–१ का स्थानीयलाई भोक्टेनी खोला पार गर्न निकै कठिन थियो। खोला तर्ने बेला मनमा डर, बाढीको बेलामा जीवनको जोखिम। तर अहिले ती दिनहरू सम्झना मात्रै बनेका छन्।
सरकारको चार करोड बढी बजेटमा पक्की पुल बनेको छ, जसले पटौना र भोक्टेनी गाउँबीचको दूरी मात्र होइन, जोखिम पनि घटाइदिएको छ। २०८० पुसमा सुरु गरिएको निर्माण कार्य २०८१ को असारमा बाढीले भत्काएपछि केही समय रोकिएको थियो। तर हार नमानिई भदौबाट फेरि काम थालियो, र हाल पुल पूर्ण निर्माण सम्पन्न भइसकेको छ।
वडाध्यक्ष टमबहादुर घिसिङले बताएअनुसार, अहिले पुलमार्ग हुँदै साना ठूला सवारीहरू, किसान, विद्यार्थी, र स्थानीय बासिन्दाहरू सहजै ओहोरदोहोर गरिरहेका छन्।
यद्यपि, पुल दुवैतर्फको सडकमा कालोपत्रे गर्नु बाँकी छ। निर्माण कम्पनी अहिले रौतहटको लमाहा क्षेत्रमा कार्यरत भएकाले, सो काम सकेर भोक्टेनी फर्किने र बाँकी काम सकाउने वाचा गरिएको छ।
एक समय खोलामा हाम फालेर वा ट्रिपरको सहारामा यात्रा गर्ने बाध्यता अब अन्त्य भएको छ। वडाको कार्यालय, विद्यालय, बजार, खेतबारी—सबै गन्तव्य अब एकै पुलले जोडिएको छ।
यसअघि नै भोक्टेनीतर्फ आउने चापिनी खोलामा पनि पुल बनेको छ, जसले समग्र क्षेत्रको यातायात सुविधा बलियो बनाएको छ।
