म्याग्दीको गलेश्वरमा बसको झ्यालबाट टाउको निकालेर हेर्दै गरेकी एक किशोरीको गेटमा ठोक्किएर मृत्यु भएको छ। शुक्रबार राति करीब १० बजे मुस्ताङबाट बेनीतर्फ आउँदै गरेको रा १ ख १६१३ नम्बरको बस गलेश्वरस्थित एक धर्मशालाको गेट हुँदै परिसरभित्र जाँदै गर्दा दुर्घटना भएको हो।
बसमा सवार सल्यान त्रिवेणी गाउँपालिका–६, लवाङकी १५ वर्षीया सरस्वती ओलीको टाउको धर्मशालाको गेटमा ठोक्किँदा गम्भीर घाइते भएकी थिइन्। तत्कालै बेनी अस्पताल पुर्याइएकी उनलाई चिकित्सकले मृत घोषणा गरेका थिए।
जिल्ला प्रहरी कार्यालय म्याग्दीका सूचना अधिकारी सागर पौडेलका अनुसार मृतकको शव पोस्टमार्टमका लागि अस्पतालको शवगृहमा राखिएको छ। यता, घटनापछि बस चालक प्रहरी नियन्त्रणमा छन् र घटनाको थप अनुसन्धान भइरहेको प्रहरीले जनाएको छ।
यस प्रकारको दुर्घटना विगतमा पनि दोहोरिएको भन्दै प्रहरीले यात्रुहरूलाई यात्राका बेला झ्यालबाट टाउको वा शरीर बाहिर ननिकाल्न र आवश्यक सुरक्षा सावधानी अपनाउन आग्रह गरेको छ। उक्त दुर्घटनाले यात्रुहरूलाई स्तब्ध बनाएको छ।
