हेटौंडा । राजस्व घट्दा प्रशासनिक खर्च पनि नधान्ने अवस्थामा देश पुगेको छ । तर, नाकाहरुबाट भने तस्करी रोकिएको छैन । उच्च तहकै सेटिङमा कसरी तस्करी भइरहेको छ भन्ने उदारण शुक्रबार मकवानपुरमा देखियो ।
प्रहरी चौकी रातमाटेले बिहान ना.७ ख ९४२८ नम्बर ट्रक नियन्त्रणमा लियो । ट्रकमा तस्करीका कपडा लगायत खुद्रा सामान थिए । तर, प्रहरीले ट्रक भन्सार तथा राजश्व अनुसन्धान कार्यालयमा बुझाएन ।
दिउँसो १२ बजे छाडियो । प्रहरी चौकी रातमाटेका हवल्दार विनय चौधरीले एक लाख ६० हजार रुपैयाँ असुलेर ट्रक छाडेको स्रोत बताउँछ ।
हवल्दारले सेटिङ मिलाएर यसरी ट्रक छाड्नु अस्वभाविक लाग्न सक्छ। तर, उनी सामान्य हवल्दार होइनन् । बागमती प्रदेशका प्रहरी डीआईजी कृष्णहरी शर्माका घुमुवा हुन् ।
जसकारण चौकीमा असई प्रमुख भएपनि हवल्दार चौधरीकै हालिमुहाली चल्छ । स्रोतका अनुसार हवल्दार चौधरीले सेटिङ मिलाएपछि डीआईजीले नै निर्देशन दिएर सो ट्रक छाडिएको हो ।
मकवानपुरका एक प्रहरी भन्छन,‘आज बिहान ७ बजेबाट १२ बजेसम्मको सिसिक्यामेरा हेर्ने हो भने सेटिङको सबै धन्दा पर्दाफास हुन्छ ।’ यस्तो धन्दा दैनिक जसो चलिरहेको छ ।
सो ट्रक वीरगञ्ज नाकाबाट सेटिङ मिलाएर भित्रिएको हो । जसकारण मकवानपुरमा पनि पाँच घन्टामै छुटेको हो।
रातमोट चौकी इलाका प्रहरी कार्यालय पशुपतिनगर अन्र्तगत पर्दछ।
तर, सो चौकीलाई निर्देशन दिने अधिकार इप्रकालाई छैन । पछिल्लो समय तस्करीको लाइन खुलाइएकाले सिधैं डीआईजी कृष्णहरी शर्मा र मकवानपुरका एसपी विश्वराज खड्काको निर्देशनमा गाडी समाउने र छाड्ने काम हुने गरेको छ ।
इप्रका पशुपतिनगरमा हाल इन्सपेक्टर बिमला कठायत छिन्। रातमाटेमा चेकजाँचमा जाँदा किन त्यहाँ गएको भनेर उनलाई एसपी र डीआईजीले गाली गर्ने गरेको समेत प्रहरी स्रोत बताउँछ ।
डीआईजी शर्माले विभिन्न नाकामा घुमुवाहरु खटाएर तस्करीको लाइन मिलाएको खुलेपछि हालै प्रहरी प्रधान कार्यालयले समेत छानविन गरिरहेको छ । त्यसपछि उनले केही घुमुवा फिर्ता गरेका छन् ।
तर, अझै पनि मुख्य नाकामा घुमुवा राखेर उनले असुली धन्दा चलाइरहेको स्रोत बताउँछ । उनले खटाएका कतिपय प्रहरी त गाँजा र चरेशको तस्करीको समेत लाइन मिलाउन सक्रिय रहेको प्रहरी अधिकारी बताउँछन् ।
आईजीपी बसन्त कुँवर समेत अवकाशमा जान लागेकाले यही मौका छोपेर नाकाहरुमा तस्करी मौलाएको हो।
अनलाईन नेपाल बाट साभार
