सर्लाही – सर्लाहीको हरिवन नगरपालिका-११, मालपोत कार्यालयअगाडि ८ गते राति करिब ११:५० बजे भएको सवारी दुर्घटनामा स्कुटी चालकको मृत्यु भएको छ।
लालबन्दीबाट नयाँरोडतर्फ जाँदै गरेको बा.प्र.-०२-०२८ प ६५०८ नम्बरको स्कुटी सोही दिशातर्फ गइरहेको ना.६ त ३०५० नम्बरको ट्याक्टरको पछाडि जोडिएको ट्रेलर (डब्बा) मा ठोक्किँदा दुर्घटना भएको हो।
दुर्घटनामा स्कुटी चालक हरिवन नगरपालिका-८, चापिनीका २५ वर्षीय कवि रिखाम मगर गम्भीर घाइते भएका थिए। टाउको, छाती र च्यापुमा गम्भीर चोट लागेका उनलाई तत्काल हरिवनको स्वाभिमान अस्पताल पुर्याइएको थियो। थप उपचारका लागि वीरगञ्जस्थित स्पर्श अस्पताल लगिएको भए पनि मंसिर ९ गते राति करिब १:३० बजे उपचारकै क्रममा उनको मृत्यु भएको प्रहरीले जनाएको छ।
त्यसैगरी, स्कुटीमा पछाडि सवार हरिवनकै ४५ वर्षीय रामजी बस्नेतको खुट्टाको पैतालामा र ढाडमा चोट लागेको छ। उनको अवस्था मध्यम रहेको र स्वाभिमान अस्पतालमा उपचार भइरहेको छ।
दुर्घटनापछि ट्याक्टर चालक फरार रहेका छन् भने ट्याक्टर र स्कुटीलाई प्रहरीले नियन्त्रणमा लिएको छ। घटनाको जानकारी पाएलगत्तै इलाका प्रहरी कार्यालय, हरिवनबाट प्रहरी निरीक्षक भीमराज सुवेदीको नेतृत्वमा टोली घटनास्थलमा खटिएको थियो।
यस घटनाबारे थप अनुसन्धान जारी रहेको प्रहरीले जनाएको छ।
